People's Day sa Barangay Aguit-itan

Guinbuhat yana nga adlaw an People's Day sa Barangay Aguit-itan. Ini resulta san Iwas Dengue Days nga guinpatuman san lokal nga pan-gubiernuhan san Calbayog. Sumala san report san General Services Office, an opisina nga naka-assign sa Barangay Aguit-itan, damu kaupay nga basura ug iba pa nga nakakahugaw an ira na-obserbaran sa nasabi nga barangay.

Nagkamay-ada sin usa nga dialogue sa butnga san mga opisayales san ciudad kaupod an mga Department Managers ug san mga lumulupyo san Aguit-itan. Nahibaru-an nga an barangay may-ada kalugaringun nga anti-littering ordinance, kundi tungod san katig-a san ulo san kadam-an nga naukoy sa nasabi nga barangay, ini dire nahipapatuman. Guin abuyun san mga taga Aguit-itan sa atubangan san mga opisyales san ciudad nga istrikto na nga ig-iimplimentar an nasabi nga ordinansa nga upod na an pagdire san mga kutay (o sampay sa pathway) sugad man an pagdire sa pagtangkal o paghigot san mga baboy sa pathway.

Usa liwat nga daku nga problema nga nahibaruan mao an basura labi na sa tinatawag nga wetland area. Sugad man an problema mahitungod san presensya san mga fish vendors sa dalan. Guin harampangan liwat an mahitungod san mga paragbulad diin an ira pagbulad nagdadangat san maraut nga baho dire la sa nasabi nga barangay kundi naabot pa sa City Hall compound ug sa Barangay West Awang. Tungod sine, guinkasaragbutan nga igdidire na na pagbulad ug ini guin uyunan san mga nadabihan pina-agi san ira pagsaad nga mabalhin sira san iba nga lugar gawas san city proper.

Guin abuyunan nga sa ti-abot nga Lunes, an mga opisyales sa panguna ni Mayor Reynaldo Uy, kaupod an mga Department Managers mao an malibot sa bug-os nga Aguit-itan agud makit-an kun may resulta an guin abuyunan sa guinbuhat nga People's Day.

Si Mayor Reynaldo Uy kaupod an pipira nga paragbulad sa Barangay Aguit-itan.

Si Konsehala Regina Rabuya san iya paghatag san mensahe. Kaupod sa litratu sira Vice Mayor Ronald Aquino, ug sira Konsehal Jim Uy, Ver Porlares, Ronald Mark Aquino, Arturo Pasacas ug Jonas Montealto.

An pipira san mga Department Managers nga nag-atendir san People's Day.